BR LA UNION – Mangipasimudaag ti maymaysa a panggep kontra kenni Presidente Ferdinand Marcos Jr. iti umasping a waragawag da Bise Presidente Sara Duterte ken Davao City Mayor Sebastian “Baste” Duterte, nupay adda latta iti publiko a manghusgar nu daytoy ket kinnutsabo wenno nagsina a panangiyebkas ti nakaro a pungtot.
Daytoy ti imbaga ni Deputy Speaker ken Iloilo Representative Janette Garin.
Segun kenni Garin, saan a mabalin a tagi-awanen iti agpada a waragawag ti agkabsat nga agpada a nabutosan nga opisyal.
Kinunana a no agpada ti panagsasao da panggep ti kinaranggas kontra iti Presidente, mabalin a mangipamatmat daytoy ti intension ken nakaro nga emosyon a rumbeng a maseryoso.
Immuna nga imbaga ni VP Sara bayat ti online press conference idi Nobyembre 2024 nga adda binilinna a mangpapatay kada Presidente Marcos, First Lady Liza Araneta-Marcos, ken sigud nga Speaker Martin Romualdez no isuna ti umuna a mapatay.
Kabayatanna, maipagarop nga insawang met ni Mayor Baste iti maysa a panagu-ummong a “maysa laeng nga ulo ti kasapolan,” a ti maipagarop a dak-dakamatenna ket iti Presidente.
Segun kenni Garin, inraman ti National Bureau of Investigation (NBI) dagiti nasao a waragawag iti agtultuloy nga imbestigasyon da, nu dagitoy ket paset ti namin-adu a daras a pangta nga adda implikasyon na iti nailyan a seguridad.
Dagiti maipagarop a panagpangta ni VP Duterte ket kabilang kadagiti basaran ti Article IV ti impeachment complaint, a mangak-akusar kenkuana ti betrayal of public trust, culpable violation of the Constitution ken high crimes.
