BR LA UNION – Pinagbotosan ken nagdesisyon iti House Committee on Justice idi kalman, Abril 29, 2026 nga adda “probable cause” (umdas a rason) iti dua nga impeachment complaint kontra kenni Vice President Sara Duterte.
Babaen ti botos a 53-0, awan ti kimmontra ken awan ti nag-abstain, inaprubaran ti komite iti mosyon nga adda probable cause dagiti reklamo.
Pinagtipon dagiti nasao a reklamo, partikular iti maikatlo (manipud kenni Fr. Jose Saballa, et al.) ken maikapat ( manipud kenni Atty. Nathaniel Cabrera) nga impeachment complaint a naidatag kontra iti bise presidente.
Dagiti nausar a basaran iti alegasyon ket dagiti sumaganad: biddut a panangusar ti confidential funds (misuse of funds); unexplained welath wenno nakalemmeng a kinabaknang; betrayal of public trust; culpable violation of the Constitution; ken panangipangta ti biag ni Presidente Ferdinand Marcos Jr., First Lady Liza Araneta-Marcos, ken House Speaker Martin Romualdez.
Ti sumaruno nga addang kalpasan nga ideklara ti house committee on justice nga adda “probable cause” dagiti reklamo kontra iti bise presidente, maisumite ti report ti komite idiay plenaryo ti House of Representatives tapno pagbotosan, a nakatuding inton Mayo 4, 2026.
Nu makagun-od ti apagkatlo wenno 1/3 a botos manipud iti amin a miyembro ti Kamara idiay plenaryo, mabukel ti Articles of Impeachment ken mai-transmit idiay Senado, nga agserbi kas impeachment court, para iti pormal nga impeachment trial.
