LA UNION – Nadun-dunor iti dua a menor de edad a balasitang kalpasan a naidungpar iti nagluganan da a traysikel iti maysa a kotse, iti kawatiwatan ti national highway, Barangay Dissor-or, Bauang, La Union.
Nabigbig dagiti biktima nga isuda Gemmalyn Castillejos, 16 ken Jenny Castillejos, 12,agpada a residente ti Barangay Quinavite, Bauang.
Iti traysikel ket minaneho iti maysa a Ramil Samson, 33, ti Barangay Sta. Monica bayat a ti kotse ket immando iti managan Reynal Cacdac, 43-anyos.
Base iti report, agsikko koma iti kattigid a direksiyon ti kalsada iti kotse idi naidungpar ditoy ti napaspas a traysikel.
Kas resulta, nagsagaba ti pannakadun-dunor iti dua a biktima ken agtultuloy ita a maag-agasan iti Ilocos Training and Regional Medical Center.
Saan pay nga ammo nu siasino kadagiti dua a respondent drivers iti mangsungbat ti pannaka-ospital dagiti dua a balasitang.
Agtultuloy ti imbestigasyon ti pulisiya iti nasao nga aksidente.
