LA UNION – Naiturong iti kostudiya ti pulisya dagiti dua a menor de edad a maatap a nagbarsak iti pampasahero a bus idiay Barangay Central West, ili ti Bauang, La Union.
Naammuan ti Bombo Radyo manipud iti Bauang Police Station, personal a nagreport kadakuada ti bus driver a ni Johnny dela Rosa, residente iti Barangay Palugsi-Limmansangan ti nasao nga ili, tapno ireklamo dagiti nagbarsak iti manmanehuenna a lugan.
Base iti salaysay ni dela Rosa, nabuong iti windshield ti bus gapu iti panangbarsak dagiti agtutubo, ngem awan ti nasugatan a pasahero.
Gapu iti daytoy, tiniliw dagiti pulis dagiti dua a menor de edad ken nai-turn over iti sidong ti municipal social worker.
