LA UNION – Dukduktalen ita iti pulisya ti motibo ken pakabigbigan dagiti suspek ti napasamak a pammaltog a nakatayan iti dua a lallaki ti nagsina a lugar idiay maikadua a distrito iti probinsya a La Union itattay bigat.
Naammuan ti Bombo Radyo manipud iti Tubao Police Station, agarup alas-7:40 itattay bigat idi a paltugan dagiti suspek ti drug personality a ni Rocky Palaganas idiay igid ti kalsada ti Barangay Lloren, ili ti Tubao.
Napartak a naglibas dagiti suspek a naglubbon iti maysa a motorsiklo kalpasan a napatayda ni Palaganas.
Iti met report a nakalap manipud iti Agoo Police Station, sumrek koman iti trabahoda ti biktima ken construction worker a ni Archie Ventura kaddua ti kabsatna a naglubbon iti motorsiklo idi a saeden isuda dagiti suspek idiay Barangay San Julian East, ili ti Agoo itattay alas-8:00 ti bigat.
Natirwan iti bala ti naduma-duma a paset ti bagi ni Archie a nagbanag iti pannakatay daytoy, kabayatan a nagasat ti kabsatna a a saan a natiwan iti bala.
Sigun kadagiti residente a kaimatang iti krimen, dagus a naglibas dagiti suspek a naglugan iti maysa a motorsiklo nga immadayo iti crime scene.
Sakbay a napasamak ti pammaltog kenni Archie ket maipagarup a nabayag nga agur-uray dagiti suspek iti nasao a lugar.
Kabayatanna, personal a nagturong iti nasao nga ili ti provincial director ti La Union Police Provincial Office a ni S/Supt. Rodelio Samson tapno imatunan iti maisaysayangkat nga imbestigasyon seknan kadagiti napasamak a pammapatay. (Absalom Flores)
