BR LA UNION – Indetalye ni Department of Migrant Workers (DMW) Secretary Hans Leo Cacdac iti makagapo ti panagpukaw dagiti dua nga overseas Filipino workers (OFWs) nga isuda Imee Pabuaya ken Aleli Tibay nga immunan a naipadamag a mapukpukaw idiay Hong Kong idi Oktubre 4.
Iti naisayangkat a presscon idi kalman, Biyernes, Oktubre 17, inwaragawag ti sekretaryo a naiyaw-awan dagiti dua bayat ti panag-hiking da idiay Lung Mun Country Trail.
Segun Cacdac, daytoy ket maibasar iti salaysay dagiti dua a Pinay overseas worker kalpasan a nasarakan da ken addan iti natalged a kasasaad bayat nga adda da iti kustodiya ti Migrant Workers Office idiay Hong Kong.
Segun pay kenni Sec. Cacdac, agkal-kalap da iti kanayunan a detalye seknan iti insidente ken namnamaen nga agsumite dagiti dua ti sinapataan a salaysay seknan iti nasao a pasamak.
