BR LA UNION – Umabot ti nasurok 10,000 a tattao manipud iti umuna laeng a distrito ti La Union ti naapektaran iti nagtipon nga epekto ti Tropical Cyclones Luis, bagyo Maymay ken Habagat, segun kenni Deputy Speaker Paolo Ortega idi kalman, Sabado.
Segun kenni Ortega, iti uppat nga aldaw a napasaran ti probinsiya iti nakaru a panagtudo ken napigsa nga angin, kaibatugan daytoyen ti maysa bulan a panagtudo.
Babaen iti dagus a panagtignay wenno panagresponde iti lokal a gobierno, nasurok a 700 nga umili ti nasapa a naiyakar kadagiti evacuation centers.
Iti intero a probinsiya, 19 a babbalay iti nailista a partially damaged, idinto a dua ti naan-anay a nadadael wenno totally damaged.
Maibasar iti report a dimmanon iti opisina na, ₱2.9 million ti nadadael iti benneg ti agrikultura; livestock ket dimmanon iti ₱205,000; ken pannakadadael iti imprastruktura ket agdagup iti ₱3.4 million.
Kabayatanna, agarup ₱31 million a tulong ti nakiddaw ken naibunong kadagiti naapektaran a komunidad iti umuna a distrito—wenno kaibatugan iti agarup ₱3 million agingga iti ₱5 million iti kada lokal a gobyerno, depende iti kalawa ti perdisyon wenno pannakadadael.
