BR LA UNION – Agpat-patnag iti isay-sayangkat dagiti otoridad a search-and-rescue operations para iti aganay 20 a tattao a mapapati a na-trap iti sirok ti narsuod a pasdek idiay Angeles City itay parbangon ti Domingo, Mayo 24, 2026.
Segun kenni Angeles City public information officer Jay Pelayo, saan nga agsardeng ti rescue operations agingga nga adda senyales ti biag manipud kadagiti posible a survivors iti sirok dagiti debris.
Kinuna ni Pelayo a napinget iti ar-aramiden nga operasyon dagiti rescuer kalpasan a makadetect da ti signs of life manipud kadagiti posible a na-trap.
Innayon na, a tumultulong metten ti naduma-duma a local government units iti rescue efforts bayat a nagdeploy iti dadakkel a floodlights iti lugar tapno masuportaran iti overnight operations.
Segun kadagiti otoridad, kaadwan a mapukpukaw ket dagiti construction worker.
Nasurok 20 a tattao metten ti na-rescue manipud iti insidente.
Bayat a maysa ti kumpirmado a natay a mapapati a maysa a Malaysian tourist nga agdag-dagus iti maysa nga apartelle a kaabay ti narsuod a pasdek.
Inlawlawag ni Pelayo a 20 laeng ti bilang dagiti mapukpukaw, maisupadi iti immuna a naireport a 23.
Kinuna na, nga adda ti sumagmamano nga indibidwal a naipadamag a missing ngem idi agangay ket nadiskubre nga awan da iti lugar idi napasamak ti pannakarsuod ti pasdek, idinto a dagiti dadduma ket nakaawiden iti babbalay da.
