LA UNION – Marikrikna itan iti panangdalapus ti storm Toby idiay San Francisco, California.
Iti pannakiuman iti Bombo Radyo kenni Noimie Lyn Abubo nga agtrabtrabaho kas nurse iti nadakamat a lugar, kinunana a makapaspasar iti napigsa nga angin ken panagtudtudo sadiay.
Maipagarup a saan a normal nga adda ti dumaldalapus a bagyo iti agdama idiay California gapu ta ita ket panawen ti spring idiay lugarda.
Sigu pay kenni Abubo, a base iti damag idiay California ket nakaro nga apektado iti bagyo ti East Coast kangrunaan ti Sta. Barbara county ken papaakaren dagiti otoridad ti nasurok a 21, 000 residente kadagiti natalged a lugar.
Kabayatanna, base met iti report ti National Weather Centre, ita nga aldaw ti Biyernes ti namnamaen a panagbuyat iti napigsa a tudo sadiay ken pagan-annaden met dagiti residente nga agbalin nga alerto iti panaglayos.
