Inrugin ti Philippine Amusement and Gaming Corporation iti maysa a 24/7 hotline para kagiti indibidual nga addaan ti problema iti panagsugal, kas sungbat iti panawagan ni Kabataan Partylist Representative Renee Co.

Makitinnulong iti PAGCOR iti Seagulls Flock Foundation tapno sanayen dagiti operators ti hotline.

Dagiti umawag ket mabalin a mai-refer kadagiti partner rehab centers kas iti Bridges of Hope, Life Recovery Center, ken Milestone Health and Wellness.

Malaksid iti nasao nga addang ket addaan pay ti self-exclusion program nga iti minimum gaming ban ket maysa a tawen, ken nainget iti proseso sakbay a mapalubusan a makasubli ti panagay-ayam. Nasurok a dua ribo metten dagiti naaprobaran nga aplikasyon para iti nadakamat a programa.

Inallukoy ni PAGCOR Chair Alejandro Tengco iti publiko nga ipakaammo iti PAGCOR dagiti naigamer ti sugal para iti maiyanatup a tulong ken rehabilitasyon.###