BR LA UNION – Naarestar ti maysa a 29-anyos a lalaki, agpapaay kas supervisor iti maysa a nalatak a fastfood chain idiay Barangay Poblacion, Bacnotan, La Union gaputi kaso a qualified theft.
Ti suspek ket residente ti Barangay Butubut Sur, Balaoan.
Maibasar iti inisyal nga imbestigasyon dagiti otoridad, idi Hunyo 15, 2026, nadiskubre ti 36 anyos a babai a maysa met laeng a supervisor wenno shift leader iti nalatak a panganan ken residente ti Barangay Cantoria, Luna, a mapukpukaw ti cash sales nga aggatad iti P295,000.
Iti pannakiuman ken PMAJ Arcellie Pang-ag, Public Information Officer-LUPPO, inlawlawag na nga idi nadiskubre ti aramid ti suspek, nakita da ti outgoing shift supervisor iti men’s restroom ti establisimiento a maipagarop a dinangranna ti bagina babaen ti kartib.
Naamwan pay iti nasao nga imbestigasyon a nagastos na amin ti mapukpukaw a kwarta ti establisyimento gapu iti maipagarop a pannakaigamer na iti online gambling activities ken maipagarop nga inusar na pay ti naited kenkuana a company-issued mobile phone.
Kabayatanna ti suspek ket temporaryo a nawayawayan kalpasan a nagpiyansa ti 80,000 pesos.
Nagpalagip ni PMAJ Pang-ag kadagiti addaan ti negosyo a pilyen a naimbag dagiti empleyado nangruna iti pangitalkan ti kaha wenno kuwarta.
