BR LA UNION – Nakasaganan ti Senado nga imbestigaran iti nasaknap nga online gambling ditoy pagilian.
Idaulwan ni Senador Erwin Tulfo, kas chairman iti Senate Committee on Games and Amusement dagiti naidatag a gakat kontra online gambling inton Agosto 14.
Segun ti senador, maipangruna iti panangtalantan dagiti nasao a gakat agsipudta maibilang a krisis iti sitwasyon.
Impaganetget na, kasapolan a dagus a ma-aksyunan tapno maresolba dagiti problema nga adda pakainaiganna daytoy.
Nupay total ban ti tarigagay iti senador, denggen na latta ti posisyon iti gobyerno kas iti Philippine Amusement Gaming Corporation (PAGCOR) ken Department of Finance.
Kinuna na a kitaenna iti pros and cons nu naan-anay a maipawil ti online gambling.
Impaganetget ti senador nga awan ti regulasyon isunga awan sardeng iti panagsugal ti tattao — awan pay ti kontrol nu mano ti maitaya iti nasao a sugal.
Impaganetget na a saan a kasapolan a tingitingen nu anya ti napat-pateg, iti birok manipud iti sugal wenno dakes nga epekto na iti sociodad.
Tatantanen ti Senate Games and Amusement Panel iti uppat a linteg, tallo a resolusyon, ken privilege speech maipapan iti online gambling.
