BR LA UNION – Dagus a naideport iti 24 a Pinoy manipud US kalpasan a rinugyan ti US iti nalawa a deportation kadagiti undocumented immigrants.
Segun kenni Philippine Ambassador to the United States Jose Manuel Romualdez, dagiti 24 a Pinoy ket agpapada a naka-aramid ti iligal nga aktibidad idiay US.
Ngem segun iti ambassador, saan a seryoso a krimen ti pakairam-ramanan dagitoy.
Binalakadan ni Romualdez dagiti Pilipino idiay US nga awanan ti status, a saan nga urayen a mai-deport, nudiket ag-boluntaryo laengen nga agawid ditoy Pilipinas, wenno rugyan nga i-trabaho dagiti dokumento tapno pagbalinen a legal ti panagtalinaed idiay Amerika.
Kinuna ni Romualdez, nga adda bassit a tiyansa dagiti Pilipino nga agtrab-trabaho ken agbay-bayad ti buwis, tapno makagun-od ti legal status, nangruna nu is-ponsoran dagiti employers da.
Impaganetget ti opisyal a nakasagana iti embahada a tulungan dagitoy iti panagsubli da ditoy pagilian tapno maliklikan iti nalawa a deportasyon.
Immuna nga in-deport ti US dagiti gasut nga illegal immigrant ken foreign criminals kasaruno ti immandar ni President Donald Trump a mass deportation operation.
Dagitoy ket naibiyahe a nagsubli iti naggapwan da a pagilian babaen ti military aircraft.
Ingkari ni Trump nga ipatungpal na iti largest deportation effort iti pakasaritaan ti America.
