Dead on arrival iti pagagasan ti maysa a 25-anyos a bartender kalpasan iti panagdinnungpar ti minaneho daytoy a motorsiklo ken iti maysa a van iti National Highway a masakupan ti Brgy. Ar-arampang, Balaoan, La Union agarup alas-3:35 tattay parbangon.
Nabigbig ti pimmusay ken nagmaneho iti motorsiklo a ni George Iry Aragon, residente ti Brgy. Oaqui No. 3, Luna, La Union.
Base iti inisyal nga imbestigasyon ti Balaoan Police, agturturong iti amianan a direksyon ti motorsiklo a minaneho ti biktima bayat nga agpa-abagatan a direksyon met ti van a minaneho ni Edmond Ramirez, 37-anyos, manipud Sudipen, La Union.
Maipagarup nga immagaw ti bangir a linya ni Aragon kasaruno ti panagdinnungpar da ti van.
Ginandat ti van a lisyan ti motorsiklo ngem nagdinnungpar met laeng dagiti dua a behikulo.
Naiturong pay iti pagagasan ni Aragon ngem naideklara daytoy a pimmusay.
Naamwan a paawiden ti biktima manipud iti trabaho na idinto a nakaaramat daytoy ti half-face helmet idi napasamak ti insidente.
