LA UNION – Pakabuklan a siyam a business establishments ditoy syudad ti San Fernando, La Union iti naiyiswan ti show cause order babaen iti puwersa ti Social Security System (SSS) kadwa da iti Philippine National Police (PNP).
Kagiddan daytoy iti insayangkat a kaunaan nga inspeksiyon ti SSS RACE team nga indaulwan da Atty. Renato Jacinto Cuisia, Assistant Vice President for Operations Legal Services iti SSS ken SSS La Union Branch Head Francisco Pentecostes kadagiti pasdek negosyo ditoy La Union.
Paset daytoy iti Run After Contribution Evaders wenno RACE program ti SSS, nga addaan ti ranta a kamaten dagiti delinquent employers wenno saan nga agirem-remit ken agbaybayad ti SSS contibutions para kadagiti empleyado dagitoy.
Babaen iti nasao a show cause order, mapawaywayan dagiti employers iti 15 nga aldaw tapno i-settle iti SSS contributions iti empleyado dagitoy ket nu mapaay da, makaswan dagiti employers nga addaan kaibatugan a 12 years of imprisonment.
Indiaya met ti SSS kadagiti employers nga i-avail iti condonation program, maiyannurot iti R.A .11199 wenno SSS act of 2018 a pinirmaan ni Pres. Rodrigo Duterte tapno makissayan iti bayadan dagitoy a penalty.
Immunan a pinatalgedan ni Pentecostes kabayatan ti pannakiuman ti Bombo Radyo La Union kenkuana nga umabot iti 2,700 dagiti nadiskubre da a delinquent employers ditoy probinsiya.
