LA UNION – Adda iti 28 a klase ti paputok iti maibilang nga illegal ken saan a rumbeng a gatangen ken usaren iti panangsarabo ti baro a tawen.
Segun iti Philippine National Police – Civil Security Group, iti listaan dagiti maiparparit a paputok ken pyrotechnic devices iti panangsarabo ti baro a tawen 2025 ket maiyannurot iti Executive Order 28 ken Republic Act 7183.
Kabilang dagiti illegal a paputok ket dagiti sumaganad: watusi, piccolo, pop pop, five star, pla-pla, lolo thunder, giant bawang, giant whistle bomb, atomic bomb, atomic triangle ken dagiti mas napigpigsa pay ken large-sizes a Judas belt, goodbye Delima, hello Columbia, goodbye Napoles, super Yolanda, mother rockets, kwiton, super lolo, goodbye Bading, goodbye Philippines, Bin Laden, coke-in-can, pillbox, kabasi, special, Kingkong, tuna ken goodbye chismosa.
Inlawlawag ti CSG, a maipawil dagiti paputok nga addaan ti explosive content a nalab-labes ngem 0.2 grams wenno nasurok 1/3 teaspoon ti pulbura.
Napalagipan pay ti publiko a kadagiti laeng certified Philippine Standard retailer a gumatang iti paputok tapno masiguro a natalged iti panangsarabo ti baro a tawen.
