LA UNION – Ur-urayen iti pulisya dagiti pasahero a nasugatan no mangidatag iti daytoy ti kaso kontra iti driver ti bus a natinnag iti kawatiwatan ti Naguilian-Baguio road idiay Barangay Bato, ili ti Naguilian, La Union.
Iti pannakiuman ti Bombo Radyo kenni C/Ins. Cirilo Butigan Jr., hepe ti Naguilian Police Station, kinunana a niruk-atanda ti bus driver kalpasan nga awan iti nagsubli a complianant idiay kwerpo ti pulisya a mangidatag iti kaso.
Kompleto met dagiti dokumento ti lugan, ngem ipabus-oyda iti dadduma pay imbestigasyon iti Land Transportation and Franchising Regulatory Board (LTFRB).
Kabayatanna, sigun kenni Butigan, nakarruaren manipud iti ospital ti 28 nasugatan a pasahero.
Immuna iti daytoy, maipagarup a pimmalya iti preno ti nasao a bus isu a nagdiretso ken natinnag daytoy iti taltalon nga addaan ti innem a kadapan manipud iti nasao a kalsada.
Ti nasao a bus ket naggapu manipud idiay syudad ti Baguio ken agturong koma daytoy idiay probinsya ti Abra.
