LA UNION – Agtultuloy iti imbestigasyon ti pulisya maipapan iti natinnag a bus ken nakasugatan ti 28 pasahero na iti kawatiwatan ti Naguilian-Baguio Road idiay Barangay Bato iti ili ti Naguilian, La Union idi malem kalman.
Naamuan ti Bombo Radyo manipud iti Naguilian Police Station, naggapu iti syudad ti Baguio ken agturong iti probinsya ti Abra ti nasao a bus a minaneho ni Froilan Purruganan, 29, ti Barangay Tanqui, syudad ti San Fernando, La Union.
Base iti salaysay ti driver ket naaddaan ti mechanical error wenno pimmalya iti preno ti imanmaneho na a lugan isu a nagdiretso ken natinnag iti taltalon a mapatta-patta innem a kadapan ti kangato na manipud iti kalsada.
Nagsikeg met ti bus idi limmapag iti nasao a lugar.
Naamuan a dumanon iti 35 iti kabuklan a nakalugan a pasahero ti naaksidente a bus.
Bin-eg a nagsagana ti minor injuries iti bagi ti 28 pasahero nga naiturong iti Naguilian District Hospital.
Iti agdama, am-amuen pay ti pulisya dagiti mabalin a pagsungbatan ti driver ken ti operator na gapu iti aksidente.
