LA UNION – Inaresto iti pulisya dagiti tallo a barangay chairmen a naaktuan nga agpalpallot idiay Barangay Manga, ili ti Aringay, La Union.
Nabigbig dagiti suspek a punong barangay nga isuda Wilson Apurado, 56, ti Barangay Macabato; Andres Mercado, 45, ti Barangay Sta. Cecilia; ken Ricky Santiago, 44, ti Barangay Gallano iti nasao nga ili.
Malaksid kadagiti opisyal ti barangay ket karaman pay a naaresto da Joe Allan Ruiz, 44, residente ti Barangay Sta. Cecilia; ken Eduardo Frigilliana ti Pangoa-aoan West, Aringay.
Naammuan ti Bombo Radyo a kinumpiskar dagiti kameng iti La Union Police Provincial Office (LUPPO) manipud kadagiti suspek ti P10,700 a kwarta a pagsugsugal, tallo a kawitan, ken dadduma pay nga alikamen para ti iligal a pagsusugalan.
Temporayo a naruk-atan dagiti suspek kalpasan a nagbayad iti piyansa para ti sangsanguenda a kaso a panaglabsing iti Anti-illegal Gambling Law.
