Addan iti natalged nga kasasaad ti tallo a security guard kalpasan a maaksidente iti nagluganan dagitoy nga armored car iti National Highway a masakupan iti Brgy. Acao, Bauang, La Union agarup alas-9:45 iti bigat.
Nabigbig dagiti biktima nga isuda:
•Ronnie Ramos, 37-anyos, residente iti Santiago Norte, City of San Fernando, driver iti armored car
•Richard Abellera, 34-anyos, residente iti Santiago Norte, City of San Fernando
•Dexter Verano, 36-anyos, residente iti Pacpacac, San Juan, La Union bayat a saan met a nadangran ti teller a ni Michael Bravo.
Base iti imbestigasyon nga insayangkat dagiti kameng iti Bauang Police, daldalyasaten ti armored van ti laud a direksyon iti kalsada partikular iti pasalog a paset idi maipagarup a nag-overtake daytoy iti maysa a tricycle kasaruno iti pannakapukaw iti kontrol ti driver iti manibela inggana a nagtulid daytoy iti kalsada.
Iti pannakiuman ti Bombo Radyo iti imbestigador, posible a napaspas ti panagpataray na ti behikulo.
Naamwan manipud kadagiti otoridad a naggapu dagitoy iti ili a Naguilian, La Union kalpasan da a nagala iti collection ken pasubli dan iti bangko idi napasamak ti insidente.
Awan met ti napukaw a collection wenno alikamen manipud iti nadakamat nga armored van ken kinumpirma iti pulisya nga adda ita iti natalged a kondisyon dagiti biktima.
