BR LA UNION – Inyanunsiyo ni PCol. Heryl L Bruno, agdama a La Union Police Provincial Director, a tallo nga ili ditoy probinsiya ti na-identify kas areas of immediate concern a pakaibilangan iti Agoo, Pugo ken Caba.
Inaramid ni Col. Bruno ti anunsiyo kabayatan ti naisayangkat a press conference idiay Camp Diego Silang, Carlatan, San Fernando City, idi kalman, Marso 24, 2025.
Nu ibasar iti election areas of concern classification ditoy Pilipinas, addaan daytoy ti uppat a kategorya, kabilang iti: green, yellow, orange ken red.
Iti areas of immediate concern ket adda iti sidong iti orange category wenno kaipapanan nga adda iti serious armed threats.
Ti nasao a presscon nga inatendaran dagiti kameng ti media ditoy La Union a pakaibilangan ti Bombo Radyo ket tapno ipaka-ammo dagiti otoridad dagiti pasamak nga adda pakainaiganna iti umadanin nga eleksiyon, maimpormaran ken maballaagan ti publiko ken dagiti kandidato maipapan kadagiti rumbeng a suruten ken saan nga aramiden iti panawen ti kampanya ken eleksiyon.
Iti campaign period para kadagiti kandidato iti lokal a posisyon ket mangrugin inton Biyernes, Marso 28, wenno 45 nga aldaw sakbay iti Local and National elections inton Mayo 12, 2025.
Impasiguro pay ni Col. Bruno nga agtultuloy ti intensified operations dagiti otoridad tapno agtalinaed a nakapya iti probinsiya nangruna iti panawen ti panagkampanya dagiti lokal a kandidato, masiguro nga awan dagiti agraira a private armed groups ken loose firearms.
Sipud nangrugi ti election period ken naipatungpal ti gun ban idi Enero, addan ti lima a gun violator iti nailista ditoy probinsiya.
Kinuna pay ti opisyal, adda pakabuklan a 1,480 PNP personnel iti maideploy kadagiti istratehiko a lugar para iti eleksiyon.
