LA UNION – Dead-on-the-spot iti maysa a 35-anyos a mister, kalpasan a madungpar ti tourist idi rabii iti kawatiwatan ti national highway, sakop ti Barangay Calumbaya, Bauang, La Union.
Nabigbig iti biktima a ni Jevy Jucutan, addaan ti asawa, residente ti nasao met laeng a lugar.
Maibasar iti imbestigasyon ti Bauang Police Station, bumallasiw koma ti biktima iti kalsada, pasado alas 7:00 idi rabii, idi madayamgus ti tourist bus, a man-manehuen ni Willie Balbag, 43, addaan asawa, ken residente ti Barangay Balbaloto, Victoria, Tarlac.
Gaputi napigsa nga impact ti aksidente, dagus a natay ni Jucutan, babaen iti panangideklara ni Dr. Erwin Nonan, medical officer 2, ti nasao nga ili.
Kabayatanna, naamwan ti Bombo Radyo manipud kenni PCI Joel Lagto, agdama a hepe ti Bauang Police Station, a maidatagan ti kaso iti respondent driver ita nga aldaw ti Lunes, Pebrero 5, 2018.
