LA UNION – Agtultuloy a maag-agasan iti maysa a pribado nga ospital dagiti uppat a nasugatan a Chinese kalpasan a dimmungpar ti naglugananda a van iti dua a bus iti kawatiwatan ti national highway idiay Barangay Ili Norte, ili ti San Juan, La Union.
Base iti imbestigasyon ti San Juan Police Station, kabayatan a daldalyasaten ti nasao a van a mannamanehuen ni Johnson Ng, 48, residente ti Binondo, Manila ti kalsada ket maipagarup a killaat daytoy nga immagaw iti linya ti kasinnabatna a bus.
Gapu ta maipagarup a napartak a panagpataray ti van ket dimmungpar pay daytoy iti sabali pay a bus nga adda iti igi ti kalsada.
Malaksid iti nagmaneho iti van ket karaman kadagiti nasugatan iti tallo pay a pasahero daytoy a bin-ig a Chinese.
Agtultuloy pay laeng iti imbestigasyon ti pulisya tapno maammuan no sino iti agsungbat ti insidente.
