LA UNION – Agtaltalinaed pay laeng iti pagbaludan dagiti uppat a lallaki a maipagarup a nangriribok ken nagpaputok iti paltog iti kangitingitan ti panagragragsak iti Christmas party iti maysa nga apartment idiay Barangay Cabaroan, syudad ti San Fernando, La Union itattay parbangon.
Nabigbig dagiti suspek nga isuda Glenn Peña, 40-anyos, residente ti Barangay Nalasin, ili ti Balaoan; Vincent, 32-anyos, kaddua ti amana a ni Pablo Ariola Jr., 56-anyos; ken Jerry Peralta, 54-anyos, agpapada nga agindeg idiay Barangay Camilo Osias ti nasao nga ili.
Iti pannakiuman ti Bombo Radyo kenni S/Ins. Antonio Marzan Jr., spokesperson ti San Fernando City Police Station, kinunana a kabayatan iti panagrambak ti Paskua dagiti agindeg ti nasao nga apartment ket simmangpet dagiti agama nga Ariola a kakuyog dagiti dua pay a suspek a bin-ig a nabartek kasaruno iti panangriribok dagitoy.
Lima a daras a maipagarup a nagpaputok ti paltog ni Vicent a nagbanag iti panagbuteng dagiti agramrambak.
Maipagarup a pinangtaan pay ni Vincent a papatayenna ti maysa a 22-anyos a ganganaet a Yemeni a ni Talal Hussein Ali Nasser ken ti maysa pay a boarder nga adda ti okasyon.
Iti panagresponde dagiti pulis dagusda nga inaresto dagiti uppat gapu ta malaksid iti panangrirbok ti nasao nga apartment ket maipagarup a nagpaputok pay dagitoy iti paltog idiay Barangay Lingsat, syudad ti San Fernando kasaruno iti panaglibas a naglugan iti maysa a pick-up idi rabii.
Sigun pay kenni Marzan, umabot iti pito a basyo ti cal .45 a paltog iti narekobreda manipud iti nagsina a lugar a nakapasamakan ti panagpaputok iti igam.
Agtultuloy pay laeng iti imbestigasyon ti pulisya tapno maammuan iti pudno a makinkukua ti paltog a maipagarup nga indulin dagiti suspek sakbay a naaresto dagitoy.
Nainget met nga ad-adalen dagiti police investigators dagiti kaso a mabalinda nga idatag kontra kadagiti suspek. (Absalom Flores)
