LA UNION – Nagballaag ni Agriculture Secretary Francisco Tiu Laurel Jr. kadagiti importers ditoy pagilian nga aggun-gundaway iti panagangkat ti naduma-duma a produkto, tapno ad-adu iti mapastrekan.
Imballaag ti sekretaryo, a saan nga agduadua a mang-blacklist kadagitoy.
Inaramid ti sekretaryo ti ballaag kalpasan ti immunan a pannaka-kanselar ti permit ti maysa nga importer ti bagas manipud Batangas a maipagarup a nangideklara a 20% laeng iti naisangpet a bagas.
Segun iti sekretaryo, mangisayangkat ti ahensiya ti inspeksioyn kadagiti importers tapno masigurado a lumasat dagiti imported products iti umno a proseso, agsardeng ti smuggling, ken dadduma pay a klase ti economic sabotage.
Malaksid kadagiti importers ti bagas, kinunana a nakasagana pay ti ahensiya a mangkanselar wenno i-blacklist dagiti dadduma nga importers.
Kinapudnona, uppat nga importers ti naituding a mai-blacklist gapu iti nagduduma a panaglabsing.
Karaman ditoy dagiti aggatang iti bagas, ikan, ken asukar.
