BR LA UNION – Agdagup iti 40 a lugar ditoy Pilipinas ti naipasidong iti state of calamity (SOC) gapu iti panagduprak ti napalabas a bagyo a Crising ken dagiti agdama a bagyo Dante, Emong ken ti southwest monsoon wenno habagat.
Maibasar iti datos manipud iti National Disaster Risk Reduction and Management Council (NDRRMC), dagiti adda iti state of calamity ket pakairamanan ti 23 a siyudad ken ili idiay probinsia ti Cavite ken 17 a lugar idiay Metro Manila ken dadduma pay a probinsiya.
Iti panangmonitor ti ahensiya, dagiti adda iti sidong ti state of calamity ket pakairamanan dagiti ili ti Mangaldan ken Umingan idiay Pangasinan, Meycauayan, Paombong, Balagtas ken Calumpit idiay Bulacan, Masantol idiay Pampanga, Paniqui idiay Tarlac, Agoncillo idiay Batangas, San Mateo, Rodriguez (Montalban) ken Cainta idiay Rizal, Roxas idiay Palawan, Barbaza ken Sebaste idiay Antique, ken Malabon ken Quezon City idiay Metro Manila.
Malaksid dayta, naipasidong metten iti sumagmamano pay a siyudad idiay Metro Manila kas iti Marikina, Manila ken Las Piñas ken dadduma pay a probinsiya iti Ilocos Region kas ti Pangasinan.
Sumagmamano kadagiti nasao a lugar a makapad-padas ti nakaru a panaglayos ket naipasidong iti state of xcalamity a pakaibilangan idiay Dagupan City, Calasiao, Lingayen, Malasiqui ken Sta. Barbara ken idiay Cebu City.
Iti agdama, apektado iti kalamidad iti nasurok 2.7 milyon nga indibidwal manipud iti nasurok 700,000 a pamilya iti amin a rehiyon ditoy pagilian malaksid laeng idiay Eastern Visayas.
Iti pakabuklan a bilang, nasurok 147,000 indibidwal manipud iti nasurok 40,000 a pamilya ti agtaltalinaed iti evacuation centers bayat a nasurok 90,000 indibidwal manipud iti nasurok t 23,000 pamilya ket makidag-dagus temporaryo iti daduma a lugar.
Nakailista pay dagiti nasao a lugar kadagiti insidente ti panaglayos, landslide, pannakarsuod dagiti istruktura ken alipogpog.
Kangrunaan a nadidigra iti rehiyon iti Central Luzon, sumaruno iti Negros island region ken CALABARZON.
Iti mapas-pasaran a kalamidad ditoy pagilian ket nakatayan ti 12 tattao bayat a walo iti missing ken walo met ti naipadamag a nasugatan.
