BR LA UNION – Maibasar iti datos ti Department of Health Center for Health Development I (DOH-CHD I), umabot iti 4,151 a kaso ti Human Immunodeficiency Virus wenno HIV iti Rehiyon Uno, manipud 1984 agingga Marso ita a tawen 2025.
Segun kenni CHD1 Spokesperson, Dr. Rheuel Bobis, manipud Enero agingga Marso ita a tawen, agarop 174 dagiti baro a kaso iti nailista.
Kaadwan kadagiti kaso ket manipud iti probinsiya ti Pangasinan a nakairekord ti 2,162; La Union – 689; Ilocos Sur – 584; Ilocos Norte – 461; ken idiay Dagupan City – 245, a buklen dagiti edad 25-35 ken 15-24.
Segun kenni Dr. Bobis, maiyakar ti HIV iti uppat a wagas.
Umuna, babaen ti unprotected sexual intercourse wenno saan a natalged a pannakinaig iti indibiduwal nga addaan ti HIV wenno AIDS; kas koma nu saan nga agaramat ti condom kas proteksiyon.
Maikadwa, maiyakar babaen ti sharing syringes, wenno pannaki-innusar ti dagum wenno heringgilya iti panagitudok ti droga.
Maikatlo, mother-to-child transmission—maiyakar ti ina ti virus iti sikog na.
Maikapat, babaen ti blood transfusion, a mapasamak nu iti maysa a tao ket nasaksakan ti dara a positibo ti HIV. Ngem daytoy ket man-manu a mapasamak.
Kas sungbat kadagiti kaso ti HIV ditoy rehiyon, agtultuloy iti panangisayangkat ti community-based screening ken panangiwaras kadagiti impormasyon maipapan iti panangliklik ti nasao a sakit.
Impakaammo ni Dr. Bobis iti publiko a ti Anti-Retroviral Therapy (ART) para HIV wenno AIDS ket libre a maipapaay kadagiti pasyente manipud kadagiti treatment hubs ditoy rehiyon uno.
Kabilang idiay Mariano Marcos Memorial Medical Center idiay Ilocos Norte; Lacasandile Medical Clinic and Diagnostic Center ken Ilocos Sur Provincial Hospital – Gabriela Silang idiay Ilocos Sur; Ilocos Training and Regional Medical Center ditoy La Union; ken Pangasinan Region 1 Medical Center idiay Dagupan City, Pangasinan.
