(Update) LA UNION – Nagpalagip manen ti pulisya kadagiti nagannak nga addaan ti anak a menor de edad na bantayan dagitoy ken suruten ti curfew hour idiay syudad ti San Fernando, La Union.
Iti pannakiuman ti Bombo Radyo kenni C/Ins. John Guiagi, hepe ti San Fernando City Police Office, kinunana nga umabot iti 42 a menor de edad iti tiniliwda iti nagpatnag a panagpatrolya ken panangipatungpal iti ordinansa ti syudad.
Kaadduan kadagiti natiliw ket dagiti agtutubo a lallaki.
Sigun kenni Guiagi, kadduada iti panagpatrolya dagiti kameng iti San Fernando City Social Welfare and Development Office.
Pinaayabanda dagiti nagannak iti istasyon ti pulisya ken naipasidong pay dagitoy iti counseling sakbay a napaawidda kadagiti bukodda a balay.
Panggep ti pulisya ken ti lokal a gobyerno a salakiban dagiti agtutubo babaen ti panangipatungpal iti ordinansa ti syudad.
