LA UNION – Madandanagan dagiti kakabagyan iti sumagmamano a mangngalap a nagturong idiaypaset ti West Philippines idi rabii ti Huebes kalpasan a saan a nakasubli dagitoy.

Iti pannakiuman ti Bombo Radyo La Union kenni Reggie Salanga ti Barangay Osmena, ili ti Dasol, Pangasinan, kinunana nga idi pay laeng koma kalman a namnamaenda a nakaawiden ti kabsatna a ni Mac Arthur ken dagiti tallo pay a mangngalap a kaarrubada.

Sigun pay kenni Reggie, base iti istorya dagiti nakaawid a mangngalap idiay lugarda a kabayatan nga addada idiay taaw ket killaat a dummalapos iti napigsa nga angin kasaruno iti panagsaplit dagiti dadakkel a dalluyon kadagiti bilog.

Sumagmamano kadagiti bilog a pagkalap ket nadadael gapu iti saan a namnamaen a pasamak.

Kinuna pay ni Reggie a nasayaat met iti panawen idi kalman ken natalinaay met ti baybay idi a nagpataaaw dagiti kaarrubana ken ni Mac Arthur.

Kabayatnna, naipakaammo metten iti insidente kadagiti kameng ti Philippine Coast Guard ken lokal a gobyerno tapno sapulen dagiti mapukpukaw a mangngalap. (Absalom Flores)