Agtaltalinaed nga apektado iti saan a bumaba ti 467,000 nga indibidual idiay Visayas ken Mindanao gapu ti Bagyong Basyang, maibasar iti kabaruan a datos ti Office of Civil Defense (OCD).
Segun kenni OCD spokesperson Junie Castillo, ti bilang ket dandani katupag ti 132,000 a pamilia manipud kadagiti 850 a barangay, ken sumagmamano kadakuada iti agtaltalinaed kadagiti evacuation centers.
Agtaltalinaed met a 12 dagiti nailista a natay gapu iti panagduprak ti bagyo, nga iti agdama ket maipaspasidong ti beripikasion babaen iti tulong ti dead and missing cluster.
Idiay Cagayan de Oro, uppat dagiti nailista a natay gapu ti landslide bayat a dagiti nabatbati ket gapu ti pannakalmes a gapuanan ti nakaro a layus.
Kabayatanna, pakabuklan a 445 dagiti nadadael a pagtaengan, 38 kadagitoy ti naan-anay a nadadael, ken 407 dagiti partially damaged.
Agtultuloy nga iberberipika ti OCD dagiti nailista a lima a pimmusay idiay Iligan City.###
