BR LA UNION – Dinayyeg ti magnitude 5.4 a gingined iti Cebu ken Leyte agarop alas-3:22 itay malem, Abril 6, 2026 maibasar iti report ti PHIVOLCS.
Nadetermina ti epicenter iti kaadayu a 17 kilometro abagatan-a-daya ti City of Bogo, Cebu, iti kauneg a 10 kilometro.
Maibasar iti instrumental intensities, narikna ti gingined iti naduma-duma a lugar:
Intensity IV: San Francisco, Cebu; Hilongos ken Villaba, Leyte
Intensity III: Liloan, Talisay, Cebu City, Lapu-Lapu City, Cebu; Isabel, Baybay, Carigara, Ormoc City, Abuyog, Leyte; Esperanza, Masbate; Hinundayan, Southern Leyte
Intensity II: Kawayan ken Naval, Biliran; Roxas City, Capiz; Carcar, San Fernando, Argao, Asturias, Cebu; Iloilo City; Dulag, Alangalang, Palo, Leyte; La Carlota City, Negros Occidental; Silago ken Sogod, Southern Leyte
Intensity I: Tapaz, Capiz; Borongan City, Eastern Samar; Jordan, Guimaras; Passi City, Iloilo; Aroroy ken Cataingan, Masbate; Bacolod City, Negros Occidental; Gandara, Samar
Iti agdama, mangisay-sayangkat ti assessment dagiti otoridad seknan iti ginubway a perdisyon iti sanikua ti napigsa a gingined.
Maysa a residente idiay Mabuli, Tabogon, Cebu iti nangibinglay ti nagbirri a paset ti balay na kalpasan ti 5.4 magnitude earthquake .
Idiay met Bogo City, na-evacuate dagiti pasyente ti ospital bayat a nagtataray a rimwar dagiti tattao manipud kadagiti nagduduma a pasdek ken nasuspinde ti afternoon class dagiti estudiyante.
Binalakadan ti PHIVOLCS iti publiko nga agbalin nga alerto ken agsagana kadagiti aftershocks.
