LA UNION – Lima a pagadalan iti kolehiyo ditoy Region One iti mangipat-patungpal itan ti limited face to face classes ken internship partikular iti medical ken health allied courses or programs.
Iti interview ti Bombo Radyo La Union kenni Danilo Bose, OIC chief education program specialist ti Commission on Higher Education (CHED) Region 1, kinunana a dagiti naaprubaran pay laeng a medical ken health allied courses or program a mangisayangkat ti in-person classes ket iti Doctor of Medicine, Bachelor of Science in Nursing, BS in Medical Technology or Medical Laboratory Science, BS in Physical Therapy, Midwifery, Public Health, Dental Medicine ken Pharmacy.
Naminsan pay nga impaganetget ni Bose a dagiti nasao a pagadalan ket dimmalan iti nainget a proseso a maiyannurot iti inyetnag nga annuruten ti DOH ken IATF, sakbay a naaprubaran ti aplikasyon dagitoy a mangisayangkat ti limited face to face classes babaen iti CHED Central Office.
Maysa kadagiti requirement ket nasken nga adda ti konsultasyon kadagiti nagannak.
Maysa a pagadalan ti kolehiyo idiay Ilocos Norte ken uppat a tertiary education institutions idiay probinsya ti Pangasinan iti nangrugin a mangipatungpal ti limited face to face classes.
Kabayatanna, agtultuloy met iti flexible learning nga ipatpatungpal ti CHED Region 1 kadagiti estudyante iti kolehiyo.
