LA UNION – Nakatuding a kumiddaw ti pulisiya iti kopya ti CCTV manipud iti maysa a department store ditoy ciudad ti San Fernando, La Union ita nga aldaw tapno takwaten nu siasino ti nangibelleng ti fetus iti basuraan nga adda iti sango ti nasao nga establisiyemento.
Immuna ti daytoy, dimmatag iti istasyon ti Bombo Radyo La Union dagiti garbage collector a nagakop ti basura idi rabii, kalpasan a madiskubre iti maysa a naidumduma a plastic.
Iti interview ti Bombo Radyo kenni Mico Flores, residente ti Barangay Canaoay ditoy ciudad, kinuna na a nagkolekta da ti basura iti batog ti Mart One agarop alas 7:00 idi rabii, ngem bayat a makomikom da nga agidis-diskarga kadagiti inakop da a basura ket ditoy a nakita da iti natay a fetus a naikarga iti maysa a plastic.
Kinumpirma met ni Dr. Karen Bermudez ti City Heath Office a ti nasao a fetus ket mapatta-patta nga agtawen ti uppat agingga lima a bulan ken maysa daytoy a babae.
