LA UNION – Adda itan iti salwad ti San Fernando City Social Welfare and Development Office dagiti lima nga agkakabsat nga ubbing kalpasan a maisalakan dagitoy iti kameng ti Philippine Drug Enforcement Agency (PDEA) Regional Office-1 a nangisayangkat iti buy-bust operation kontra iti inada nga agsusop koma iti shabu idiay Purok 3 ti Barangay Sevilla, syudad ti San Fernando, La Union.
Naammuan iti Bombo Radyo manipud iti PDEA-Regional Office-1, naaresto ti nadakamat nga ina a ni Catherine Aballe kaddua ti maysa a tricycle driver a ni Ryan Mangilinan ti nasao a lugar.
Dua a sachet a naglaon iti maatap a shabu ti nakompiska iti kameng ti PDEA manipud kadagiti suspek.
Sigun kenni Aballe, susupenda koma ti shabu no saan a simmangpet dagiti otoridad.
Naammuan met manipud iti misis a kadduana iti balay dagiti lima nga annakna nga 11-anyosti inauna kabayatan a maysa a tawenna laeng ti buridek.
Nakabalud met ita ti asawana a sumangsango met iti kaso nga addaan ti pakainaigan iti iligal a droga.
Kabayatanna, impaima metten iti PDEA dagiti ubbing iti San Fernando City Social Welfare and Development Office kabayatan a masapsapud iti kakabagyan a mangaywan kadakuada.
