BR LA UNION – Saan a bumaba iti 51 a tattao ti natay kalpasan a natamaan ti airstrike ti Israel iti maysa nga elementary girls’ school idiay Minab, probinsiya ti Hormozgan abagatan ti Iran, maibasar iti report ti state media.
Maibasar iti Iranian state reports, nasurok itan nga 40 iti kumpirmado a natay iti nasao a panagatake a maibilang a ”civilian target.”
Malaksid dayta, impadamag pay ti Mehr news agency a dua pay nga estudyante ti natay iti sabali nga Israeli strike a timmama iti
maysa a pagadalan idiay Tehran.
Iti report ti Al Jazeera, ti panagraut iti nasao a pagadalan dagiti ubbing a babbae ket mabalin a manigubway ti dak-dakkel a kontrobersiya iti panagbomba ti Israel ken ti U.S.
Nagkari ni U.S. President Donald Trump ti tulong para kadagiti umili nga Iranian, ngem ti panagngato ti bilang dagiti natay a sibilyan ket mabalin nga ipaganetget ti gobyerno ti Iran kas panaglabsing iti international law ken maysa nga agresyon kontra kadagiti umili.
Kabayatanna, segun iti Ministry of Health and Medical Education ti Iran, ribu a sibilyan ti natay wenno nasugatan kagiddan ti pannakadadael ti sumagmamano a pampubliko nga imprastraktura iti uneg ti 12 nga aldaw a rinnupak iti baetan ti Amerika ken Israel kontra Iran idi Hunyo 2025.
