LA UNION – Madem-demolish wenno manarimaan ti panangrakrak iti 60 a babbalay idiay Barangay Baroro, Bacnotan, La Union.
Dagiti nasao a babbalay ket pagnanaedan iti nasurok 224 nga indibiduwal, kaadwan ket mangngalap ti pagbiagan da ken dagiti dadduma kadagitoy ket nasurok 20 a tawenen nga agnanaed iti nasao a lugar.
Iti nasao a lote a mapatta-patta nga aglawa ti 17 nga ektarya ket asideg iti igid ti baybay.
Maibasar iti imbingay nga impormasyon ti sheriff a nangimet ti court order, dimmalan daytoy iti umno a proseso.
Iti lote a nakaipatakderan ti babbalay dagiti residente ket maipagarop a kukua ti pribado nga indibiduwal.
Segun iti sheriff a sakbay a naipatungpal ti demolisyon ket naipaka-ammo daytoy kadagiti maseknan a residente ken namin-adu pay a daras a naitantan ti demolisyon.
Naamwan a kadagiti 66 a household owners, 39 ti naipaayan ti P26-k a pinansiyal a tulong idinto a ti nabatbati ket subject for assessment.
Naipaayan pay ti food packs dagiti naapektaran a pamilya manipud Department of Social Welfare and Development (DSWD).
Kabayatanna, aganay 100 a PNP personnels a naggapo iti naduma-duma a law enforcement unit ti mangbanbantay iti nasao a lugar kabayatan ti panangisayangkat ti demolition.
