LA UNION – Natay bayat a maag-agasan iti ospital iti maysa a 64-anyos a lolo gapu iti sinagaba na a nakaru a sugat partikular iti ulo, kalpasan a dimmungpar ti man-manehuen na a motorsiklo iti maysa pay a motorsiklo, a minaneho ti maysa a menor de edad.
Napasamak ti aksidente idiay Bangar-Castro provincial road sakop ti Barangay Ubbog, Bangar, La Union.
Iti biktima ket nabigbig iti nagan a Melvin Flores Jr., residente ti Barangay Luzong Norte, Bangar, La Union.
Natay daytoy bayat a matamtaming iti Balaoan District Hospital idiay Balaoan, La Union.
Base iti report ti pulisiya, head-on collision iti panagdinnungpar iti dua a motorsiklo nga aggapo iti agsinnumbangir a direksiyon.
Iti kapigsa ti impact ti aksidente, natay ni Flores bayat a nasugatan ken agtultuloy a maag-agasan iti ospital iti backride na a ni Calvin Andrei Flores, 15, ti Barangay Luzong Norte.
Nasugatan met iti menor de edad a driver iti maysa pay a motorsiklo a ni Ricardo Ambrosi, 16, ti Barangay Seng-ngat, Sudipen, La Union.
Iti agdama, agtultuloy iti ar-aramiden nga imbestigasyon dagiti otoridad iti napasamak nga aksidente.
