BR LA UNION – Inarestar ti San Fernando City Police iti maysa a driver ti puraw a closed van, a nagkarga ti 66 a buryas, bayat nga agturong iti Barangay Quinavite, Bauang, La Union.
Kagiddan daytoy iti panang-intercept dagiti otoridad ti nasao a lugan iti sangwanan ti maysa a mall ditoy siyudad idi agsapa ti Lunes, Enero 6.
Napaay ti driver a makaiparang kadagiti otoridad, iti dokumento para iti pannakai-biyahe dagiti nasao a buryas.
Ti nasao a behikulo ket nai-turnover iti Office of the City Veterinarian agraman dagiti na-intercept a buryas para iti umno a disposisyon.
Iti driver ken kakadwa na iti nasao a behikulo a maipagarop a naggapo idiay Candelaria, Quezon ket naidatagan ti reklamo a panaglabsing iti Provincial Ordinance 417-2023 wenno “Ordinance Providing for Animal Quarantine Regulation to Prevent the Entry and Spread of Communicable Diseases of Livestock, Poultry, Meat and its By-Products and Guidelines for its Implementation in the Province of La Union” ken City Ordinance 2023-14 wenno “An Ordinance Prescribing the Proper Management, Containment and Control of African Swine Fever (ASF) in the City of San Fernando”.
