Nagdinnungpar ti dua a motorsiklo iti paset ti National Highway a sakupen ti Gov. Ortega Street ti Brgy. 3 ditoy Siudad ti San Fernando, La Union.
Maibasar iti imbestigasion ti City of San Fernando Police Station, nabigbig ti driver ti Honda ADV nga addaan ti plate no. 504 PJX a ni Joseph Gilbert Barra, agtawen ti 29, awanan asawa ken residente ti Brgy. 61-A, Union Civica St. idiay Galas, Quezon City idinto a nabigbig met ti nangiturong ti Honda TMX 125 a ni Reynante Riingen, agtawen ti 44, naasawaan ken residente ti Brgy. 22, Pagdildilan iti ili ti San Juan.
Nailanad iti Police Blotter, bayat a dumaldalyasat ti Honda ADV nga agturong nga agpaabagatan ket dita a saanna a naripar nga adda met ti kapadana a motorsiklo a sumungsungad a nangitunda ti panagdinnungpar dagitoy.
Gapu iti daytoy, nagsagaba ti sugat ti driver ti Honda ADV kaduana pay a nasugatan ti kalubbonna a ni Lailanie Gigantone, agtawen ti 25, awanan asawa ken residente ti Brgy. Plainview Mandaluyong City pakairamanan pay ti driver ti Honda TMX no sadino naitaray dagitoy iti balay-pagagasan para iti naan-anay a pannakatamingda.
Kabayatanna, naammuan a napagtutulagan dagiti agsinnungbangir a partido nga ibaklay ti driver ti Honda TMX ti magastos ti nangiturong ti Honda ADV nga agdagup ti 35 ribu a pisos.
