BR LA UNION – Kinumpirma ti Leyte Provincial Police Office a naidatagan ti kaso nga illegal possession of firearms ken panaglabsing iti election gun ban dagiti pito a pulis a konektado iti maipagarop a pammaltog kenni Albuera mayoral candidate Rolando “Kerwin” E. Espinosa Jr.
Segun kenni Police Colonel Dionisio Apas Jr., Provincial Director ti Leyte Police, 14 nga armas iti nakumpiskar manipud kadagiti pito ken adda dagiti saan a rehistrado a paltog, kabilang iti riple ken pistol.
Segun kenni Apas, dagiti pito ket adda iti administrative custody ken maipasidong iti administrative proceedings.
Saan pay a naipablaak ti kinasiasino dagitoy, ngem mapapati a pakaibilangan ti maysa a police colonel, lieutenant colonel, staff sergeant, tallo a corporal, ken maysa a patrolwoman.
Impaganetget ni Apas, saan pay a maibilang dagitoy a suspek, ngem ketdi persons of interest bayat nga agtultuloy iti imbestigasyon.
Iti naisayangkat a paraffin test, rimwar a negatibo dagiti pito, ngem positibo iti gunpowder residue dagiti 14 a paltog a nakumpiskar manipud kadakuada.
Inlawlawag ni Police Lt. Col. Vivien Malibago ti forensic unit, iti negatibo a resulta ti paraffin test ket saan a konklusibo, agsipudta adu iti banag a mabalin a makaapekto kas iti panagsuot ti gloves, kaatiddog ti paltog, ken kondisyon iti aglawlaw.
Maipalagip a napaltugan ni Espinosa idi Abril 10 bayat nga adda iti campaign event.
Natamaan isuna iti abaga bayat a nasugatan iti kabsat na ken maysa a menor de edad.
Immunan nga imbaga ni Espinosa a posible a pulitika iti motibo ti pammaltog kenkuana.
