LA UNION – Dua a nagsina nga anti-gambling operations iti insayangkat dagiti otoridad ditoy syudad ti San Fernando, a naka-arestaran iti pito a sugador.
Iti umuna nga operasyon ket naisayangkat idiay Barangay Cabaroan, SFC a naka-arestaran dagiti sumaganad: Samson Duclayan, 50, construction worker; Dominador Mendoza, 66,construction worker; ken Orson Duclayan, 47, maysa tricycle driver, agpapada a residente ti nasao a lugar.
Dagitoy ket akto a natiliw nga agsusugal iti mahjong, ken nagresulta iti pannaka-kumpiskar iti maysa a set ti mahjong tiles ken bet money nga umabot ti P60.
Iti met maikadwa nga operasyon ket naisayngkat iti Barangay Parian, ditoy met laeng syudad.
Nagresulta daytoy iti pannaka-arestar kada: Vicente Casuga, 38; Elmer Torres, 33, agpada a residente ti Barangay Sinapangan, Balaoan; Ramon Ordinario, 37, tubo ti San Teodoro Oriental, Mindoro ken Rommel Daliva, 21, baro, residente ti Pacdal, Baguio City.
Dagitoy ket naaktuan nga agsusugal iti maaw-awagan a poker ken nagresulta iti pannaka-kumpiskar iti maysa a set ti poker card ken bet money nga umabot ti P100.
Dagiti nasao nga indibiduwal ket pada-pada a naidatag iti cuerpo ti pulisiya para iti umno a disposisyon.
Nakatuding met a maidatagan dagitoy iti kaso a panaglabsing iti P.D. 1602.
