LA UNION – Umabot iti bilang a 71, 364 dagiti agturpos nga agad-adal iti senior high school wenno Grade 12 iti intero a Region 1 ita a tawen ken dagitoy ti kaunaan aprodukto iti impatungpal a K to 12 program ti Department of Education (DepEd).
Iti eksklusibo nga interview ti Bombo Radyo La Union kenni Darius Nieto, Regional Information Officer ti DepEd-RO1, kinuna na nga ibilaing da a balligi iti implementasyon ti programa gaputa naikkan ti gundaway dagiti graduates a maala ken madiskubre iti bukod da nga skills.
Kinuna na pay a napateg daytoy para kadagiti graduates a Grade 12 a kayat na ti agtuloy nga agadal tapno makapili ti maiparbeng wenno umno a kurso iti kolehiyo para iti mas napinpintas a trabaho a serken iti masangwanan.
Segun kenni Nieto a maiyannatop daytoy iti tema kadagiti Moving Up and Graduation Ceremonies ita a tawen a, “K to 12 Learners: Ready to Face Life’s Challenges.”
Iti School Year (SY) 2017-2018 ket pormalen a nagleppas kadagiti pampubliko a pagadalan kalpasan iti naiganwat a graduation rites kas iti:
Kindergarten: Moving Up or Completion Ceremony
Grade 6: Graduation Ceremony
Grade 10: Moving Up or Completion Ceremony ken
Grade 12: Graduation Ceremony
Maipalagip a ti Senior High School (SHS) ket dua a tawen a panagadal, partikular iti Grades 11 and 12, kas panang-kimpleto iti K to 12 program.
Maragsakan met ni Nieto a nangiwaragawag iti Bombo Radyo nga awan pay iti naawat da a reklamo maipapan kadagiti naiganwat a Moving Up and Graduation Ceremonies.
Maipalagip nga iti napal-palabas a graduation rites, makaaw-awat ti DepEd kadagiti reklamo, partikular manipud kadagiti nagannak, maipapan iti nagarbo unay a panangiganwat ti seremonya.
