Maseknan ni Senator Risa Hontiveros gapo iti rimuar a 74% nga online traffickers nga agilaklako ti video ken ladawan kadagiti menor de edad ket kakabagian ken am-ammo metlaeng dagiti biktima.
Iti panagdngngeg ti Committee on Women, agparparang ti report ti International Justice Mission Philippines a tunggal online trafficker ket adda tallo nga ubing a biktima.
Nadakamat pay iti hearing nga agingga kagudwa a milyon nga ubbing ti nabiktima ti online trafficking.
Malaksid iti daitoy ket nagbalin payen a normal kadagiti sumagmamano a komunidad ti online exploitation kadagiti ubbing gapo ta isuda ti nalaka a mailako ken mapagkwartaan.
Kiniddaw ti grupo nga agbalin nga proactive dagiti law enforcement agencies ken LGUs kontra kadagiti online trafficker.
Manipud ti record iti grupo, agarop 1,500 nga ubbing a biktima ti online trafficking iti naisalakan bayat nga 445 a suspek met ti naarestar ken 270 kadakuada ket na-convict kadagiti kaso.
