LA UNION – Adda itan iti salwad ti Regional Civil Security Unit-1 (RCSU-1) ti nasurok a 800 paltog a kolurum wenno saan a ni-renew iti makinkukua kadagiti lisensya dagitoy kalpasan ti naisayangkat a ceremonial turn-over idiay Camp Diego Silang idiay syudad ti San Fernando, La Union.
Iti nasao a seremonia ket indaulwan da S/Supt. Rodelio Samson, provincial director ti La Union Police Provincial Office (LUPPO) ken ni Supt. Mariano Rodriguez, hepe ti RCSU-1 nga inimatangan ni C/Sup. Romulo Sapitula, Regional Director ti Police Regional Office-1 (PRO-1).
Sigun kenni S/Supt. Samson, agtalinaed iti salwad ti pulisya dagiti paltog nga insuko dagiti gun owners tapno maliklikan dagitoy nga agbalin a subject iti maisirbi a search warrant ken makaswan.
Mabalin met nga alaen dagiti makinkua kinunana, dagiti paltog no maka-renew da iti permits babaen ti tulong iti pulisya.
Kabayatanna, kinuna met ni C/Supt. Sapitula, nga immabot iti nasao a bilang dagiti nai-turn over a paltog kadagiti naduma-duma nga istasyon ti pusliya idiay probinsya gapu iti panangikagumaan ti pulisya a mangisayangkat iti Oplan Katok ken kanayon a panangisirbi ti search warrant. (Absalom Flores)
