LA UNION – Pormalen a naidatag idiay piskalya ti kaso a panaglabsing iti Anti-illegal Gambling Law dagiti operitiba ti National Bureau of Investigation (NBI) Regional Office-1 kontra iti siam a tattao nga naaresto manipud iti maysa nga peryaan iti Barangay Poblacion idiay ili ti Sto. Tomas, La Union.
Iti pannakiuman ti Bombo Radyo kenni NBI Regional Office-1 Assistant Director Rommel Vallejo, kinuna na a dinaropda ti nasao nga iligal a pagsusugalan kalpasanda a nakaawat ti impormasyon manipud iti saan a nainaganan nga indibidwal.
Iti naisayangkat nga operasyon, uppat a mangimatmaton ti drop ball game ti peryaan iti naaresto kabilangen ti lima pay nga agsusugal.
Dumanon met iti nasurok P6,000 karaman iti sumagmamano nga alikamen ti pagsusugalan ti nakompiska nga usaren ti NBI kas ebidensya kontra kadagiti naaresto.
Kabayatan na, nagpanawagan met ti opisyal kadagiti umili a saan nga agpangaduan nga iyukom iti NBI wenno pulisya no adda ammo dagitoy iti nasaknap nga iligal a pagasusugalan.
Sinegurado na met a dagusda a mangaramid ti addang tapno maisardeng ti nasao a iligal nga aramid. (Absalom Flores)
