LA UNION – Siyam ti nailista a bilang dagiti nasugatan iti napasamak a vehicular accident ti nagsina a lugar idiay probinsya ti La Union.
Idiay kawatiwatan ti national highway idiay ili ti Agoo, naglak-am iti sugat ti bagida iti lima a nakalugan ti maysa a van kalpasan a makidinungpar daytoy iti kasinabatna a wagon.
Base iti repor ti Agoo Police Station, maipagarup a ginandat nga ag-overtak iti sarsarunnuenna a lugan ti van a mannanehuen ni Jonathan Bio, 36, ti Barangay San Isidro, Malilipot, Albay ngem napaay daytoy ken nakadinnungparna ti wagon nga iggem ni Reynaldo Salvador, 43, ti Barangay Villa Barcelona, San Fernando City, Pampanga nga adda iti kasupadi a linya ti kalsada.
Naipaayan metten iti agas dagiti amin a nakalugan ti van, ken nagasat met dagiti nakasakay ti wagon gapu ta awan ti nasugatan kadakuada.
Agpapada met a naglak-am ti sugat iti naduma-duma a paset ti bagida dagiti dua a motorcycle rider karaman iti dua pay nga angkas daytoy Barangay Paratong 3, Bangar.
Maipagarup a nakainom iti arak dagiti dua nga agkalubbon ti motorsiklo isu a napasamak ti aksidente.
Agtultuloy met a maag-agasan idiay ospital iti dua manipud kadagiti apat a nasugatan a nakalugan ti motorsiklo.
