LA UNION – Umabot iti 92 nga indibidwal dagiti natiliw bayat ti umuna nga aldaw nga implementasyon iti pannaka-usar ti overpass, maiyannurot iti na-amyendaran nga anti jaywalking ordinance 2017-05.
Kinuna iti Bombo Radyo La Union ni Retired Police Supt. Glenn Badua, agdama a hepe ti civil security office iti City of San Fernando, kaadwan a violators ket ordinaryo nga umili ditoy syudad ken kabangibang nga ili.
Nagbalin nga istrikto dagiti traffic enforcers iti panangipatungpal ti nasao a linteg, a nangrugi iti oras ti alas 6:00 ti agsapa agingga alas 4:30 ti malem idi kalman.
Manipud iti 92 violators, 40 kadakuada iti nagbayad ti multa a P200.
Dagiti nabatbati ket napaay nga agbayad isunga naiyisyuan dagitoy iti ticket, a nasken a bayadan da iti naipataw a multa dagitoy iti uneg ti tallo nga aldaw.
Nu mapaay da latta nga agbayad, paka-amwan dagiti otoridad iti barangay officials naggapwan dagiti violators para iti pannakaurnos ti kaso dagitoy.
Maipalagip a dagiti mabalin laeng a bumallasiw iti kalsada, babaen ti pedestrian lane, ket dagiti senior citizens, PWDs, masikog, dagiti indibidwal nga addaan ti problema iti salun-at wenno masak-sakit ken dagiti ubbing nga agtawen ti innem nga agpababa babaen iti panangbayabay iti nataengan.
Epektibo idi kalman, Pebrero uno, iti istrikto nga implementasyon ti nasao a city ordinance.
