LA UNION – Agarup makalawasen a saan a sumsumrek iti pagadalan ti maysa a high school student gapu ta maipagarup a pinabainan isuna ti mannursurona iti sango ti kaklasena idiay Old Sudipen National High School, ili ti Sudipen, La Union.
Inyestorya iti Bombo Radyo ni Misis Masi iti kasasaad ti 15-anyos ken grade 9 nga anakna a saanan a kayat iti sumrek ti klase kalpasan iti maipagarup a panangpabain kenkuana ni Teacher Medardo Bayan.
Nasakit unay iti naken ti anakna kalpasan a maipagarup a pinagsasawan ti narasaw ken kinabastos ti teacher-na iti uneg ti pagadalan a sisasango dagiti dadduma nga estudyante.
Tarigagayna a mapapanaw ti nasao a mannursuro idiay eskwelaan tapno saan a mabuteng ti estudyante nga ag-eskwela.
Kabayatanna, sigun met ti estudyante, saanna nga ammo iti nauneg a rason no apay a pinagbainan isuna ti mannursurona.
Inaklonna met a no maminsan ket nasukir met daytoy, ngem saan met a maiparbeng iti impamatmat a galad ti teacher kabayatan a mapagpagungtan daytoy a sisasango dagiti kaklase.
Naammuan met ti Bombo Radyo manipud kadagiti mangimatmaton iti pagadalan a tallo a daras metten a nagsurat dagitoy a maiturong ti nagannak ti estudyante para iti maaramid a panagsasarita ngem saan a nagparang dagitoy.
Nagkedked met a nangipaay ti rekasyon ni Teacher Bayan malaksid laeng iti panangibaga daytoy nga ipabus-oyna laengen iti Child Protection Committee ti panangtaming.
Inlawlawag met ni Atty. Rhea Joy Carbonell, legal officer ng Department of Education (DepEd) Regional Office-1 ti proseso iti panangtamin ti kapada a kaso iti eskwelaan.
Sigun kenni Atty. Carbonell, saan koma a tagi-awanen iti nagannak ti panagdar-ay iti maisaysayangkat a fact finding ti nasao a komite tapno maammuan ti pudno a napasamak.
Kinuna pay ti opisyal a mabalin met a mangidatag iti reklamo idiay opisinada ti nagannak ken ti estudyante tapno marisot ti nasao a kaso. (Absalom Flores)
