LA UNION – Agtaltalinaed a burburtiya iti pulisya ti nasarakan a bangkay ti maatap a biktima iti summary execution idiay kabanbantayan a paset iti Barangay Abut, syudad ti San Fernando, La Union.
Naammuan ti Bombo Radyo manipud iti San Fernando City Police Station, nadiskobre dagiti residente ti nasao a lugar ti nadakamat a bangkay a nakadasay iti asideg ti kalsada.
Iti panangiladawan ti pulisya, ti nasao a bagi ti lalaki ket addaan kadagiti tattoo ken nakasurat iti kannawan nga immana iti balikas a “smile now cry later”, ladawan ti ima, rosaryo, cross ken ladawan iti marka ti luwa iti kannigid a matana.
Mapatta-patta nga adda iti 20 agingga 30 a tawennan; 4’9” agingga 5”0’ ti katayagna; nakasuot iti gray long sleeve, black t-shirt, black shorts, brown belt, ken black and white shoes.
Ti ulo iti nasao a bangkay ket nabalkot ti plastic ken nakapunngo met iti imana iti masking tape.
Adda ita iti maysa a punerarya idiay syudad ti nasao a bagi ti lalaki kabayatan nga agtultuloy iti imbestigasyon ti pulisya. (Absalom Flores)
