BR LA UNION – Posible a dumanon iti nasurok 45 degrees Celsius ti nakaru a kinabara ti panawen ditoy pagilian inton tawen 2027 gaputi namnamaen a Super El Niño, maibasar iti pakdaar ti Climate Change Commission (CCC).
Segun kenni Climate Change Commissioner Albert Dela Cruz, mabalin a sumobra pay iti 1.5 agingga 2 degrees Celsius ti panagbara ti lubong iti baetan ti Pebrero ken Abril 2027 a mangigubway ti extreme weather events ken kinakurang ti tudo.
Umuna a makapadas ti nakaru nga epekto iti Region 1, 2, ken 3 mangrugi iti maudi a paset ti tawen sakbay a naan-anay a maka-apektar iti dandani amin a probinsya ditoy pagilian inton sumrek ti Marso ken Abril.
Gaputi pangta iti suplay ti danum, taraon, enerhiya, ken salun-at, ilunglungalong ti Climate Change Commission iti panagbaliw iti class schedule iti pagadalan ken proteksyon para iti outdoor workers tapno maliklikan ti pannakabilag iti init, manipud alas-10 ti agsapa agingga alas-3 ti malem.
Kas panagsagana, paing-ingetan ti Department of Education (DepEd) dagiti contingency plan, flexibility iti class schedules, ken panangisuro ti climate change concepts iti curriculum.
Nagpalagip met ti komisyon iti publiko a saan nga ag-panic wenno ag-hoard, imbes ket pagtalinaeden ti panaginom ti danum, panangaywan dagiti mula a mangkissay ti bara ken pannaki-tinnulong manipud nasyunal agingga iti tukad ti barangay.
